Aaj phir ek awaaj gunji hai,

Usake Haste hue chehare par khaamoshi chaahyi hai,

Beete hue lamho ke yaado ki baarat sajaaye,

Aaj phir usake chahare ki khaamoshi gungunaai hai.

.

Jeene ki ummid liye phir wo aaj aayi hai,

Har lamho ko aaj phir usane aajamaayi hai,

Jo kuch samajh aaya use , use dil me rakh,

Aaj phir usake chehare ki khaamosi muskurai hai.

.

Mai stabh tha use dekh,

Usaki khaamoshi,

Usaki jhilmilati aakhe,

Usake daat se dabe hoth,

Usake kaapate hue vadan,

Bas yahi bayaan kar rahe the,

Aaj phir usaki khaamoshi ne usaki aawaaj dabaai hai.

.

Ek ehsaas man me jaaga,

Kuch to irada hogaa,

Kuch to karisma hoga,

Khamoshi ki awaaj

Kabhi to jamaane ko samajh aayegi.

Khamoshi me apane sapano ko sajaate hue,

Hasin lamho ko muskuraate hue,

Gamo ko daato se dabaate hue,

Mujhase kaha mere dost yahi meri zindagi hai,

Ye baat tumhe kab samajh aayegi.

.

Ham khud se ab darate hai,

Ham khudai se muh morate hai,

Vicharo ki dhara ko nazarandaaz kar,

Ham zindagi ki nav khevate hai,

Aur khaamosi ko awaaj ka naam de,

Ek izaat ki zindagi zeete hai.

Ham khaamosh rahate hai,

Jab koi bachha sarak par rota hai,

Ham khaamosh rahate hai,

Jab koi nange vadan thand me sota hai,

Ham khaamosh rahate hai ,

Jab beti kharidi jaati hai,

Ham khamosh rahate hai,

Jab izzat luti jaati hai,

Kyoki ,

Ye sab hamaare paas ki gali me hota hai.

Ham tab tak khaamosh rahate hai,

Jab tak koi hamaare aangan me aake na roye,

Hammare ghar ke aangan me nanga na soye,

Hamaare ghar ki dahleez ko na phaane,

Aur jab tak hamaari zindagi na maange.

Hamaari khaamoshi ek awaaj ban andar dabi rah jaati hai.

.

Aur roti hui vo apani aawaaj ko dabaaye,

Khaamosh yah sochati rah jaati hai,

Kya khushnaseeb hoti meri ye dharaa,

Agar har dil ek dusare ki dhdkan ko samajhata,

Rangeen ho jaati meri ye aanchal,

Agar har pal ek indradhanush yaha banata.

Aur har dil yah gungunata,

Saare jahaa se achha, Hindustan hamaara,

Ham bul bule hai isake , ye gulsita hamaara.